අපේ ගම ගැන උදාහරණ දෙන්නට වෙන ගමක් ගැන මා දන්නේ නැත. ඇයිද කිව්වොත් අපේ ගමේ සිටින්නේ සුපිරි පොරවල්ලාය. ඒ අතර ගොවියන් බාස් වරුන් දඩයම් කරුවන්ද වෙති.
ගොවියන් ගැන කී විට මට සිහියට නැගෙන්නේ අපගේ අත්තාය. ඔහු ලඟ අවුරුදු 2300ක් පමණ පැරණි උදැල්ලක් තිබ්බේය. මෙය ආරංචි වූ දිනමින පත්තරෙන් පැමින ගස් උඩ ගල් උඩ අත්තාගේ කරේ යන විවිධ ස්ථාන වල තබා පොටෝ ගත්තෝය. මාධ්ය තුමෙක් අත්තාගෙන් මෙය ඔබ අතට පත් උනේ කෙසේද යන්න ප්රශ්න කරන විට අත්තා කීවේ
"මහත්තයෝ මේක මට ලැබුනේ මගේ අප්පච්චිගෙනි. ඔහුටද මෙයාකාරවට පරම්පරාවෙන් ලැබුන දෙයක්"
පසුව ඇසුවේ මෙපමන කල් තබා ගත්තේ කෙසේද ඇසූ විට " මහත්තයෝ, මේක එවුන්දලෑ කාලේ ඉඳන් අපි වැඩ කරන උදැල්ල. මෙච්චරකල් තියාගන්න වැඩි දෙයක් කලේ නෑ. මිට කැඩෙනකොට මිටක් ගැහුවා, උදැල්ල ගෙවෙනකොට තලයක් ගැහුවා" කියා උත්තර දුන්නේය.
මාධ්ය සර් එදා ඒ කියපු කුණුහරප අද වනතුරුත් මා අසා නැත..
බාස්ලා කිව්වාම මට මතක් වෙන අත්තාද එවැනි සුපිරි පොරකි.
ගමේ ගෙදරක කක්කුස්සියක් බැඳීමට ඒ අත්තාට බාර දෙනු ලැබීය. කක්කුස්සියක් බැඳීමට පලමු දින බවුන්ඩේසම දමන ලද්දේද ඒ අත්තා විසිනි. එය බවුන්ඩේසම නෙවේ ෆවුන්ඩේශන් කියන්න ගොස් "අම්මගේ රෙද්ද" යනුවෙන් අසාගත් පසු නැවත මා ඒ ගැන කියන්න නොගියෙමි.
බවුන්ඩේසම උඩ කක්කුස්සිය බැඳගෙන බැඳගෙන ගිය අත්තාට දහවල් තේ බීමට ගෙදර උන් කතා කර ඇත. කතා කලාට අත්තාට එලියට යා නොහැකි වී තිබිනි. මන්ද ඔහුට දොරට ඉඩ තැබීමට අමතක වී ඇත. තේ බොන්න අත්තා එලියට ආවේ එතන වූ ගසකට ලනුවක් දමා එහි එල්ලිලා බව ඇසින් දුටුවෝ කියති.
දඩයං මාමා කියා පොරක්ද සිටින අතර ඔහුගේ වැඩේ දඩයම් කිරීමය. ඔහු සතුන් මරන්නේ විශේෂ ක්රමයකටය. විශේෂයෙන් හාවුන්ය. හාවේක් මැරීමට ඔහුට අවශ්ය උඳුපියලිය ටිකක් කැරට් අලයක් සහ දැලිපිහියක්ය..
දෙබොක්කාවක දැලි පිහිය තලේ උඩට වෙන්නට තබා ඉදිරිපසින් එක පැත්තක උඳුපියලිය සහ අනෙක් පැත්තේ කැරටි තබන මාමා ගෙදර එන්නේ පහුවදාට කාගෙන් හෝ හා මස් ඕඩරයක්ද රැගෙනය..
දෙබොක්කාව ඔස්සේ එන හාවාදැලි පිහියට උඩින් ඔලුව දමා
"කැරට් කනවද උඳුපියලිය කනවද කැරට් කනවද උඳුපියලිය කනවද"
කියා දෙපැත්ත බලන අතර එතනම මැරී වැටෙන්නේ ඔහුගේම බෙල්ල කපා ගනිමිනි. දඩයම් කියන්නේ ඒවාය.
තවද කලෙකට හබරණ පැත්තේ රැකියාවට යන්නේ ඔහුට ලැබෙන ඕඩර් ලෑස්ති කිරීමටය. ඒ සතුන් මැරීමට නොවේ. අල්ලා ගැනීමටය. අල්ලන්නේද එසේ මෙසේ උන් නොවේය. අලි ඇත්තුය.
ඔහු මදු ගසා අලි ඇත්තු අල්ලන රහස කාටවත් නොකියන අතර අල්ලන්න යන්නේද තනියමය. හැබැයි රහස දැන ගැනීමට මට වියදම් වූයේ ඒ කාලයේ හැටියට රුපියල් 1000කි. ගල් බාගේ හත්සිය පනහයි බියර් ටින් එකට දෙසිය පනහයි.
අල්ලන්නේ මෙසේය. අලි ඇල්ලීමට කලමනා ලෙස තඩි දම්වැලක්, තඩි කඹයක් සහ කොහොඹ තෙල් බාගයක් ඔහු රැගෙන යයි. අලියෙක් ඇල්ලීමට එය ප්රමාණවත්ය. දම්වැලේ එක් කෙලවරක් විශාල ගහක බඳින්නේය. අනෙක් කෙලවරේ කඹය ගැට ගසා එය කොහොඹ තෙල් වලින් හොඳට පොඟවන්නේය. එච්චරය.
කොහොඹ තෙල් වලට අලියා පට්ට කැමතිය. කොහොඹ තෙල් වල පෙඟවූ කඹය පෙරේත ලෙස අලියා ගිල දමයි. කොහොඹ තෙල් වලට බඩ යනවාය. ක්ෂනිකව අලියාගේ බඩ බුරුල් වෙයි. අලියාට බඩ යන විට කඹය පිටුපසින් එලියට පැමිනෙයි. වහා ක්රියාත්මක වෙන මාමා කඹයේ ගැටගසා ඇති දම්වැල වෙනත් ගසක ගැට ගසයි. අලියා මද්දට හිරවී ඇත. ඔහුට හැක්කේ ඉදිරිපසට සහ පසු පසට යාමට පමණි. මදු ගසා අලි අල්ලන්නේ එසේය.
කොහේදෝ ගමක කැත්තක් මැද සිටුවා තනි උණ්ඩෙන් ඌරන් දෙදෙනෙක් මැරූ කතාව මාමාට කියූ පසු ඔහු කියූවේ
"ඕවා අමූලික බොරුය. කැත්තට වෙඩි තබා එසේ ඌරන් මරන්ට බැරිය"
කියාය. ඇත්තය. එය විය හැකි දෙයක් නොවේ. පට්ටපල් බොරුය.
එඤ්ඤං
#බණ්ඩා
